دیدیم:ای غنچه دهن ،کونلومی قان ایله میسن
دیدی:«بیجا یره عشقمده فغان ایله میسن»
دیدیم:انصاف ایله اینجیتمه منی عاشقینم
دیدی:«گیت،سریمی دنیایه عیان ایله میسن »
دیدیم:آغلاتما منی سرو بویون شوقینده
دیدی:«گوزیاشینی بیهوده روان ایله میسن»
دیدیم:آخر گوزلیم ،باغ و بهاریم سن سن
دیدی:«سن عمرینی حسرتله خزان ایله میسن»
دیدیم:آز چکمه میشم گوزلرینین حسرتینی
دیدی:« ئوز کونلونی یر سز نگران ایله میسن»
دیدیم:عشقینده اسیرم ،منه بس خیری نه در؟
دیدی:«اولده بو سوداده زیان ایله میسن»
دیدیم:عشق آتشی نیلر منه ؟قورخان دگلم
دیدی:«بیچاره ،یانارسان،نه گمان ایله میسن ؟»
دیدیم:ای گل ،من ازلدن ده گوزه ل عاشقیم
دیدی:«سن روحینی عشق ایله جوان ایله میسن
دیدیم:هر گون سر کویینده دولانماقدر ایشیم
دیدی:«واحد،نه گوزه ل یرده مکان ایله میسن»
+ نوشته شده در یکشنبه دوم مرداد 1390ساعت 8:44 بعد از ظهر توسط محسن
|
